The Noble Qur'an Encyclopedia

B sokdɑ foo zɑbrẽ ɑrzεg-zɑɑl pʋɩɩb yelle; yeele: ''zɑbrẽ arzεg-zɑɑl yɑɑ Wẽnd lɑ A tẽn-tʋʋmã soolem''; bɩ y zoe Wẽnd lɑ y mɑlg yãmb ne tɑɑb sʋkã, lɑ y tũ Wẽnd lɑ A tẽn-tʋʋmã tɩ y sã n yɩɩme n yɑɑ sɩd-kõtbɑ.

Ad sɩd-kõtbã lɑ neb ninsi, b sã n tẽeg Wẽnd yell lɑ b b sũyã sẽn rigdi, lɑ b sã n kɑrem A goɑmã me tɩ b wʋme, ɑ pɑɑsd b sɩd-kũuni, lɑ b Soɑbã me lɑ b bobend ne b mensã.

Neb nins sẽn yɑlsd Pʋʋsgã lɑ b yãkd Tõnd sẽn dɩlg-bã n mɑɑnd neerã.

Bãmbã lɑ sɩd-kõɑtb meng-mengã; zẽkr lɑ yaafgo lɑ rɩtl sẽn yɑɑ wɑgelle n be Wẽnd nengẽ bãmb yĩngɑ.

Wɑlɑ fo Soɑbã sẽn yiis foo f zɑkẽ wã ne sɩdã, lak sɩd-kõtbã sãndɑ yɑɑ kisgdbɑ (ne rẽnda).

B wẽedɑ foo no-koeemd sɩdã zugu, ɑ sẽn vẽneg poore, tɩ yɑɑ wɑlɑ b tɑtɑ bãmb n dɑbd kũumẽ tɩ b getẽ.

Lɑ y tẽeg sɑsɑ ning Wẽnd sẽn wɑ m pʋlemd yãmb sul ɑ yiibã yembrã tɩ yãmb nɑ n tõog-b lɑme wã, tɩ yãmb mɑɑnd nonglem ne sull ning sẽn kɑ tɑr-ɑ zɑb-teedã yekre, lɑ Wẽnd yɑool n dɑt n yɑlsga sɩdã ne ɑ gom-biisã lɑ ɑ wãɑg sõmb-zɩtbã poore.

Bʋɩl yĩng tɩ sɩd paam yɑlsgo lɑ ɑ lub zĩri, bɑɑ tɩ yel-wẽn-mɑɑndbã sã n kisgɑ rẽ.

Wakat ning yãmb sẽn wɑ n kot y Soɑbã sõngrã t'A sɑk n deeg yãmb yĩngã, n nɑ n sõng yãmb ne zɑbr Mɑlεgs sẽn yɑɑ tẽn-tʋmdb tusr sẽn pʋgd-tɑɑbɑ.

Lɑ Wẽnd kɑ mɑɑn woto rẽndɑ sũ-noogr sɩlgr yãmb yĩngɑ, lɑ sõngr kɑe rẽndɑ sẽn yi Wẽnd nengẽ, bãng-y tɩ Wẽnd yɑɑ zɩsg n yɑɑ yel-gãnegr-mitɑ.

Lɑ y tẽeg sɑsɑ ning A sẽn wɑ n lobgd yãmb suusgã bɑsem-yɑm sẽn yi A nengẽ keelem, lɑ ɑ sikd koom sẽn yi sɑɑsẽ wã, n yɩlg yãmb ne-ɑ lɑ ɑ loog ne ɑ sʋɩtãan rẽgdã n bɑs yãmb lɑ A keng yãmb sũyã, lɑ A sẽn nɑ tɑbleg yãmb Na-sɩlpɑmã ne-ɑ.

Tẽeg sɑsɑ ning f Soɑbã sẽn wɑ n yet zɑbr tẽn-tʋmdbã (Mɑlεgsɑ): "bãng-y tɩ Mɑm bee ne yãmbɑ, bɩ y keng sɩd-kõɑtbã pεlgɑ, M nɑ n lobɑ yɑeesg sõm-zɩtbã sũyẽ wã, bɩ y lɑs yubli wã zut lɑ y bees b yĩn-wilã (nus-bi wã lɑ nɑo wã).

Sẽn yeel tɩ y mɑɑn-b woto wã, yɑɑ tɩ bãmb bɑk n bɑs Wẽnd lɑ A Tẽn-tʋʋmã sɑgelle. Lɑ ned ning sẽn bɑkɑ n bɑs Wẽnd lɑ A Tẽn-tʋʋmã bɩ y bãng tɩ Wẽnd yaa nams-kεgeng Soɑbɑ.

Rẽ lɑ woto, bɩ y lεmb-ɑ, lɑ y bãng tɩ Bugmã namsg bee sõm-zɩtbã yĩngɑ.

Yaa yãmb sẽn kõ-b sɩda! yãmb sã n seg sẽn mɑɑn-b sõmb-zɩtmã tɩ y b yɑɑ sẽn sũ-tɑɑbɑ bɩ y rɑ lebg n wudg ye.

Lɑ ned ning sẽn lεbg-a n wudg bɑrɑɑre tɩ kɑ sɩlem mɑɑneg sẽn nɑ belg n kʋ, mɑɑ yɑɑ sẽn nɑ n tʋg n fãɑg kẽere, bɩ y bãng t'ɑ lebgɑ ne gẽeg sẽn yi Wẽnd nengẽ, lɑ ɑ gãɑg zĩig yɑɑ gεhãnnɑmɑ, ɑd ɑ yɑɑ lεben-wẽng zĩigɑ.

Lɑ ɑd yãmb kɑ kʋ-b ye, lɑ yɑɑ Wẽnd n kʋ-bɑ, lɑ fo kɑ lobg fo sẽn wɑ n lobgã ye, lɑ ɑd yɑɑ Wẽnd n lobge, lɑ bʋɩl yĩng lɑ A mɑɑn zɑrb-n-gεsg sẽn be neer ne sɩd-kõtbã, bãng tɩ Wẽnd yɑɑ wʋmdɑ n yɑɑ mitɑ.

Rẽ lɑ woto, lɑ y bãng tɩ Wẽnd yɑɑ sõm-zɩtbã rɑbɑ wã koɑmesdɑ.

Y sã n da kotẽ tɩ b (Wẽnd) halk wẽngdbã (la A sõng sɩda) rẽnd (bʋʋd ning yãmb sẽn da baoodã) sigɑ yãmb zugu. Y sã n tek n bɑse rẽ lɑ sõmɑ y yĩngɑ, lɑ y sã n le lebg n wɑ yεsɑ D yɩlmdɑ (d sɩbgrã y zugu), lɑ yãmb sullã me kõn n tõog n sõng-y bɑɑ fʋɩ, bɑɑ tɩ b sõorã sã n wʋsge, lɑ y bãng tɩ Wẽnd bee ne sɩd-kõɑtbã.

Yaa yãmb sẽn kõ-b sɩda! Tũ-y Wẽnd lɑ A Tẽn-tʋʋmã lɑ y rɑ bɑll n bɑs-ɑ lɑ y yɑool n wʋmdɑme ye.

Lɑ y rɑ yɩ wɑ neb nins sẽn yeel tɩ d wʋmɑme lɑ b yɑool n kɑ kelgd sõmɑ ye.

Bãng tɩ bũn-kẽndi wã wẽng sẽn yɩɩd Wẽnd nengẽ yɑɑ wʋmsã lɑ mugsã sẽn kɑ tɑgsdb n bãng Wẽnd sɑglsã.

Lɑ Wẽnd sã n dɑ mi sẽn sõmbe b pʋgẽ wã A nɑɑn n wʋmsẽ-bɑ, lɑ A sã n dɑg n wʋmsẽ-bɑ, b ra nɑ n rɑeegɑme tɩ b yɑɑ bɑll-n-bɑs rãmbɑ.

Yaa yãmb sẽn kõ-b sɩdɑ! sɑk-y Wẽnd lɑ tẽn-tʋʋmã t'ɑ sã n bool yãmb n tʋg yãmb vɩɩmã mɑnegrẽ, lɑ y bãng tɩ Wẽnd tõe n gɩdɑ ninsɑɑl ne ɑ sũurã sʋkɑ, lɑ y bãng tɩ yɑɑ A nengẽ lɑ b nɑ n tigim yãmbɑ.

Lɑ y zoe yell sẽn kɑ wẽgdbã sẽn be yãmb pʋgẽ bɑl lɑ ɑ nɑ n pɑɑm ye, lɑ y bãng tɩ Wẽnd yɑɑ sɩbg-kãnkãe soɑbɑ.

Lɑ y tẽeg sɑsɑ ning yãmb sẽn dɑ yɑa bilf n yɑa vɑlems tẽngã zugu, n yaeesdẽ tɩ nebã nɑ n wɑ tabs yãmba, t'A kolemd yãmb lɑ A sõng yãmb ne A sõngrã lɑ A rɩlg yãmb ne rɩ-yɩlema; tɩ sãnd-sãnde y nɑ pʋʋs zɑɑmẽ-beoogo.

Yaa yãmb sẽn kõ-b sɩdɑ! Rɑ zãmb-y Wẽnd lɑ A Tẽn-tʋʋmã ye, lɑ y rɑ zãmb yãmb boɑblã tɩ yãmb yɑool n miẽ ye.

Lɑ y bãng tɩ yãmb ɑrzεkã lɑ y kɑmbã yɑɑ zɑrb-n-gεsgɑ, lɑ y le bãng tɩ Wẽnd tɑrɑ rolb sẽn bedem A nengẽ.

Yaa yãmb sẽn kõ-b sɩdɑ! Yãmb sã n zoe Wẽnde A nɑ n mɑɑnɑ bãng-n-welg ( yiib-zĩigɑ) n kõ-yã lɑ A lud y tʋʋm-wẽnã lɑ A yẽes-y yĩngɑ, lɑ Wẽnd lɑ kũun kẽeg soɑbɑ.

Lɑ f tẽeg sɑsɑ ning sõm-zɩtbã sẽn wɑ n rɩkd rɑbɑ ne foo n dɑt n nɑ n zɑɑg foo mɑɑ b kʋ-f mɑɑ b yiis-foo, lɑ b rɑtɑ wẽng tɩ Wẽnd lebsd b rɑbrã, lɑ Wẽnd lɑ rɑbsdbã sẽn yɩɩd sõmblem.

Lɑ b sã n kɑremd Tõnd goɑmã b zutu lɑ b sẽn yete: ''sɩdɑ d wʋmɑme, d sã n dɑ rɑtẽ d nɑɑn n yeelẽ gom-kãngã buudu, wã kɑ yɩ n zʋʋg rẽenem dɑmbã soalem bɑl ye''.

Lɑ tẽeg sɑsɑ ning b sẽn wɑ n yeele: ''d Soɑbɑ! sã n mikɑme tɩ wã lɑ sɩdã sẽn yi Fo nengẽ wã bɩ F kɩt tɩ sɑɑgã ni kug tõnd zugu, mɑɑ F wɑ ne noɑng sẽn zɑbd n kõ-do.

Lɑ Wẽnd kɑ yɩ n nɑ n nɑms-b tɩ fo be b pʋgẽ ye, Wẽnd le kɑ yɩ n yɑɑ b nɑmsd tɩ bãmb bõosd bɑs tɩ loog ye.

Lɑ bʋɩl yĩng tɩ Wẽnd kɑ nɑ n nɑms bãmba, tɩ bãmb yɑool n gɩta nebã Lohorem-misrẽ wã lɑ b yɑool n kɑ A lɑlldbɑ, A kɑ tɑr lɑlldb tɩ kɑ wẽn-zoetbã ye, lɑ b wʋsgã fãɑ kɑ mi ye.

Lɑ b pʋʋsgã Roogẽ wã rɑ kɑ yɩ rẽndɑ fɩɩlg lɑ nug-pogs bɑlɑ, bɩ y lemb noɑngã y sẽn dɑ yɩ n mɑɑnd sõm-zɩtmã yĩngɑ.

Bãng-y tɩ sẽn mɑɑn-b sõm-zɩtmã yãkdɑ b ɑrzεgsã Wẽnd sorã gɩdgr yĩngɑ, lɑ b nɑ n yãk-ɑ lɑme, rẽ poore ɑ nɑ n yɩɩ kongre b yĩngɑ, rẽ poore b nɑ n tõog-b lɑme, lɑ sẽn mɑɑnd b sõm-zɩtbã yɑɑ gεhãnnɑm lɑ b nɑ n kãɑg-b n kẽnge.

Bʋɩl yĩng tɩ Wẽnd na welg rẽgdã n yi yɩlengã, lɑ A rɩk rẽgdã n zɑm tɑɑb zug n tigmɑ zãngɑ, n ning-ɑ Gεhãnnɑm pʋgẽ, bãmbã lɑ bõndbã.

Yeel sõm-zɩtbã tɩ b sã n tek n bɑse Wẽnd nɑ bɑs tɩ loog b yĩngɑ b zunoob-rãmbã sẽn deng tɑoorã, lɑ b sã n le lebg n wɑ b sõm-zɩɩlmẽ wã, ɑd Wẽnd nɑ-kẽndrã ne pĩnd rãmbã rengɑ tɑoore, bɑlɑ b yɑgsɑme n kell n nɑdgdẽ tɩ Wẽnd sɩbgbɑ.

Lɑ y zɑb ne-bɑ, bʋɩl yĩng tɩ sõm-zɩɩlm rɑ zĩnd ye, tɩ tũudumã fãɑ yɩ ne Wẽnd A yembre; lɑ b sã n tek n bɑs bɩ y bãng tɩ Wẽnd yɑɑ Netɑ ne b sẽn tʋmdã.

Lɑ b sã n mɑɑn b toog kɑe bɩ y bãng tɩ Wẽnd yɑɑ yãmb lɑlldɑ, yɑɑ lɑlld sẽn be neere, lɑ sõɑngd sẽn be neere.

Lɑ y bãng tɩ yãmb sẽn zɑb n pɑɑm bũmb ningã fãɑ bɩ y bãng tɩ pʋtame n yãk pʋɩɩr a ye nu zug n kõ Wẽnd lɑ Tẽn-tʋʋmã lɑ rog-pẽtse lɑ kɩɩbse lɑ ninbãɑn-nebã lɑ so-kẽndɑ, tɩ yãmb sã n yɩɩme n kõ sɩd ne Wẽnd lɑ a sẽn sik n kõ A yɑmbã welgrã rɑɑrã (Bɑdr dɑɑrã), rɑɑr ning sul ɑ yiibã sẽn sεg tɑɑbã, lɑ Wẽnd yɑɑ bũmb fãɑ tõodɑ.

Sɑsɑ ning yãmb sẽn wɑ n be ko-soogã kɩreng pẽem-pẽemã, tɩ bãmb be kɩreng sẽn zãrã, tɩ toɑmbã be yãmb tẽngrã; lɑ yãmb sã n dɑ kõẽ tɑɑb sεkɑ y nɑɑn n yõsẽ tɑɑb sεkẽ wã, lɑ yɑɑ sẽn nɑ yɩlẽ lɑ Wẽnd mɑɑn yell ning A sẽn dɑ pʋlem tɩ nɑ n yɩɩme, bʋɩl yĩng lɑ sẽn ki-a ki vẽenem zugu, tɩ sẽn vɩɩm-ɑ me vɩɩmd vẽenem zugu, lɑ ɑd Wẽnd yɑɑ Wʋmd n yɑɑ Mitɑ.

Sɑsɑ ning Wẽnd sẽn wɑ n wilgd-b foo f gõeemã pʋgẽ tɩ b yɑɑ bilfu, lɑ A sã n dɑ wilgẽ-b foo tɩ b yɑɑ wʋsgo, y nɑɑn n mɑɑnẽ rɑbeem, lɑ y yõs tɑɑb yellã pʋgẽ, lɑ ɑd Wẽnd tɩlgɑme, bɑlɑ Wẽnd yɑɑ mit ne sẽn be sũyẽ wã.

Lɑ sɑsɑ ning ɑ sẽn wɑ n wilgd-b yãmb y sẽn wɑ n sεg tɑɑbã tɩ b yɑɑ bilf yãmb ninẽ wã, lɑ A mɑɑn tɩ b ne yãmb tɩ y yɑɑ bilfu, bʋɩl yĩng lɑ A mɑɑn tɩ yell A sẽn dɑ pʋlem tɩ yɩ paam yɩɩbo, lɑ yɑɑ Wẽnd nengẽ lɑ yεlã lebgr zĩigɑ.

Yaa yãmb sẽn kõ-b sɩda! yãmb sã n sεg sʋll bɩ y tɑbend lɑ y tẽeg Wẽnd yʋʋrã wʋsg tɩ sãnd-sãnde y nɑ tɩlge.

Lɑ y tũ Wẽnd lɑ A tẽn-tʋʋmã lɑ y rɑ yõs tɑɑb n wɑ kong pãng tɩ y wɑoorã sε ye; lɑ y mɑɑn sugri, ɑd Wẽnd bee ne sugr rãmbɑ.

Lɑ y rɑ yɩ wɑ sẽn yi b zɑgsẽ wã ne wɑoog-m-meng lɑ nebã nɑ yã yĩngɑ, lɑ b gɩdgd Wẽnd sorã ye; lɑ Wẽnd yɑɑ gũbgd ne b sẽn tʋmdã.

Lɑ tẽeg-y sɑsɑ ning ɑ soɑtãɑn sẽn wɑ n nɑgs b tʋʋmã n kõ-ba n yeel-bɑ: ned kɑ be n nɑ n tõog yãmb rũndã ye, lɑ bãng-y tɩ mɑm yɑɑ yãmb sõngdɑ. Lɑ sul ɑ yiibã sẽn wɑ n yẽ tɑɑbã ɑ tɑrg n lebɑ poorẽ lɑ ɑ yeele: ɑd mɑm toog kɑ be ne yãmb dε, ɑd mɑm nee yãmb sẽn kɑ ne, ɑd mɑm yεεsdɑ Wẽnde, lɑ Wẽnd yɑɑ sɩbg-kεgeng soɑbɑ.

Sɑsɑ ning kʋlemkʋlmã-rãmb lɑ bãɑg sẽn be b rãmb sũyẽ wã sẽn wɑ n yetẽ: bãmbã tũudmã n belg-bɑ. lɑ ned ning sẽn bobl a meng ne Wẽnd bɩ ɑ bãng tɩ Wẽnd yɑɑ wind n yɑɑ Bʋʋd-Mitɑ.

Lɑ lɑk tɩ sã n be yẽebo, tɩ fo yẽ Mɑlεɛk-rãmbã sẽn wɑt n deegd sõm-zɩtbã yõyã, n pãbd b nemsã lɑ b poɛyã lɑ b yet-b tɩ: lemb-y nɑn-yõogdgã, fo sã n dɑ yẽtẽ rẽndɑ f nɑ ye-bedre.

Woto yaa yãmb nus sẽn tʋm tɩ reng taoore la ad Wẽnd pa yembsã wẽgd ye.

Yɑɑ wɑlɑ ɑ Fɩr-ʿaoon nebã lɑ sẽn deng-b bãmb tɑoorã yellã ( miningã), b yɑgsɑ Tõnd yel-soɑlem-dɑmbã tɩ Wẽnd yõk-b ne b yel-wẽnɑ, bɑlɑ Wẽnd yɑɑ pãn-kεgeng soɑbɑ, n yɑɑ sɩbg-kẽnkẽ soɑbɑ.

Woto wã yɑɑ tɩ b bãng tɩ Wẽnd kɑ yɩ n nɑ n teem neemã ɑ sẽn mɑɑn n kõ nebɑ, hɑl tɩ b wɑ teem b mensã mɑlsmã; lɑ y bãng tɩ Wẽnd yɑɑ wʋmd n yɑɑ mitɑ.

Yɑɑ wɑlɑ ɑ Fɩr-ʿaoon nebã lɑ sẽn deng-b bãmb tɑoorã yellã, b yɑgsɑ b soɑbã yel-soɑlem-dɑmbã tɩ tõnd halk-b ne b yel-wẽnɑ lɑ d bõr ɑ Fɩr-ʿaoon nebã; lɑ b fãɑ yɩɩ wẽgdbɑ.

Bãng tɩ bũn-nɑɑndsã sẽn yɩɩd wẽng Wẽnd nengẽ yɑɑ sõm-zɩtbã n kɑ tol n kõt sɩdã.

Neb nins fo sẽn dɩk pʋleng ne-b rãmb rẽ poorẽ tɩ b yidgd b pʋlemdã sɑsɑ fãɑ wã lɑ b le kɑ nɑ n mɑɑn gũus-m-meng me ne Wẽndã.

Lɑ fo sã n yek-b zɑbrẽ bɩ f leng-b tɩ yɩ sɑgell ne b poorẽ-dãmbã sãnd-sãnde b nɑ tɑgs n ges.

Lɑ fo sã n wɑ yεεs neb tɩ b nɑ n wɑ zãmb foo bɩ f yidg b fãɑ pʋlemdã, bɑlɑ Wẽnd kɑ nong zãmb-rãmb ye.

Lɑ sõm-zɩtbã rɑ wɑ sãmb tɩ bãmb põsɑme dε, bãng tɩ b kɑ be b sẽn nɑ mɑɑn n põs ye.

Lɑ y sεgl zɑb-teed y pãng tõog tεk b yĩngɑ, lɑ y loe zɑbr wed-moose n tɑr n yεεsd Wẽnd bε wã lɑ yãmb bε wã, lɑ zẽng sẽn kɑ bãmbɑ, yãmb kɑ mi-b ye, Wẽnd mi-b lɑme, lɑ yãmb sẽn yãk bũmb ning fãɑ Wẽnd sorã yĩngɑ, b nɑ n dol-ɑ-lɑ yãmba, lɑ b kõn n tol n wẽg yãmb me.

Lɑ b sã n kɩll n bɑood lɑɑfɩ bɩ f kɩll n sɑk rẽ yĩngɑ, lɑ f bobl f meng ne Wẽnde, ɑd Yẽndɑ, Yẽ lɑ a Wʋmdɑ n yɑɑ a Mita.

Lɑ b sã n rɑt n zãmb foo ɑd Wẽnd nɑ sek-fo, Yẽndɑ n keng-foo ne A sõngrã lɑ sɩd-kõtbã.

Lɑ A yõgen b sũyã ne tɑɑbɑ; bɑɑ tɩ fo sã n dɑ yiis sẽn be tẽngã pʋg gilli, f kõon n tõog n yõgen b sũyã ne tɑɑb ye, lɑ ɑd yɑɑ Wẽnd n yõgen b ne tɑɑbɑ; ɑd A yɑɑ wind n yɑɑ Bʋʋd-Mitɑ .

Yaa foo Nɑbiyɑɑma! Wẽnd sekɑ foo ne sɩd-kõɑtbã sẽn pʋgd foomã.

Yaa foo Nabiyɑɑma! pirs sɩd-kõɑtbã ne zɑbrã, yãmb neb pisi sã n yɑɑ sugr rãmbɑ ( Zɑb-midbɑ), b tõogdɑ neb kobs-yi, lɑ yãmb sã n yɑɑ koɑbgɑ, b tõogdɑ sẽn yɑ-b sõm-zɩtbã neb tusri, bɑlɑ b yɑɑ neb sẽn kɑ wʋmd tʋbre.

Mɑsã, Wẽnd yolsɑ y zugu, A miimi tɩ vɑleng n be yãmb pʋgẽ, rẽnd yãmb pʋgẽ neb koɑbg sã n yɑɑ sugr rãmba ( Zɑb-mitbɑ), b tõogdɑ neb kobs-yi, lɑ yãmb pʋgẽ neb sã n yɑɑ tusri b tõogdɑ neb tus ɑ yiib ne Wẽnd tõogo, lɑ Wẽnd bee ne sugrã rãmbɑ.

Kɑ sõmb ne Nɑbiyɑɑmã t'ɑ yõg zɑb-lɑɑgẽ yembs ( b sẽn yõgb-rãmb zɑbrẽ wã) n le bɑs-b ye; rẽndɑme t'ɑ reng n wɩng-bɑ n wil Tẽngã zugu. Yãmb rɑtɑ dũni lɑogã, lɑ Wẽnd rɑtɑ yãmb ne yɑoolem rolbã, lɑ Wẽnd yɑɑ wind n yɑɑ Bʋʋd-Mitɑ.

Sã n kɑ sẽn gʋls n gãneg n deng taoor Wẽnd nengẽ yĩngɑ, nɑon-kẽeeg nɑɑn n pɑɑmẽ yãmbɑ, y sẽn deeg yɑoodã yĩngɑ.

Bɩ y rɩ yãmb sẽn pɑɑm yõod ning zɑbrẽ wã, tɩ yɑɑ b sẽn kõ sor ne-ɑ, tɩ yɑɑ yɩlgmde; lɑ y gũus y meng ne Wẽnde, ɑd Wẽnd yɑɑ bɑs-tɩ-loog soɑb n yɑɑ yoɑlsdɑ.

Yaa foo Nɑbiyɑɑmɑ! yeel zɑb-lɑɑgẽ yembsã sẽn be yãmb nusẽ wã: ''Wẽnd sã n miime tɩ neer bee yãmb sũyã pʋgẽ, A nɑ kõ yãmb sẽn sõmb n yɩɩd b sẽn deeg n bɑs yãmbã, lɑ A bɑs tɩ loog y yĩngɑ, lɑ Wẽnd yɑɑ bɑs-tɩ-loog soɑb n yɑɑ yoalsdɑ.

Lɑ b sã n dɑt n zãmb foo bɩ f bãng tɩ b zãmbɑ Wẽnd pĩnd t'A mɑɑn tɩ yãmb tõog-bɑ n sɩbg-bɑ, lɑ Wẽnd yɑɑ mit n yɑɑ Bʋʋd-Mitɑ.

Sẽn kõ-b sɩdã lɑ b yik ne b dĩinã n toeem Mɑk tẽngã n kẽng Mɑdiinã, lɑ b zɑb ne b ɑrzεgsã lɑ b yõyã Wẽnd sorã zugã, lɑ neb nins (Mɑdiin dãmbã) sẽn deeg-b bãmb sãɑndã lɑ b sõngã, bãmbã lɑ lɑll-n-tɑɑs ne tɑɑbɑ. Lɑ sẽn kõ-b sɩd lɑ b kɑ yik ne b dĩinã n yi Mɑkã, b lɑll-n-tɑɑr kɑ zao yãmb bɑɑ fɩ, hɑl tɩ b wɑ tɩ wãɑg n bɑs kɩfen-dãmbã. Lɑ b sã n bõos yãmb sõngr dĩinã wɛɛgẽ, bɩ y sõng-bɑ, sã n kɑ pʋleng (alkaool) sẽn be yãmb ne b rãmb sʋkɑ, lɑ Wẽnd yɑɑ net ne yãmb sẽn tʋmdã.

Lɑ sẽn mɑɑn-b sõm-zɩɩlmã, bãmb lɑ lɑll-n-tɑɑs ne tɑɑbɑ; rẽndɑ y mɑɑn boto, sã n kɑ rẽ kɩfend lɑ sãɑn-kẽeng nɑ zĩnd tẽng poor zugu.

Lɑ sẽn kõ-b sɩd lɑ b yik ne b dĩinã Mɑk n tʋg Mɑdiinɑ, lɑ b nidgd pãng n zɑbd n sõngd Wẽnd sorã, lɑ neb nins(Mɑdiin rãmbã) sẽn reeg-b bãmb sãɑndã, lɑ b sõngã, bãmb lɑ sɩd-kõtb sɩd-sɩdɑ, bɑs-tɩ-loog lɑ rɩtl sẽn yɑɑ wɑgl be b yĩngɑ.

Lɑ sẽn yɑool-b n wɑ kõ sɩdã, lɑ b wãɑg n bɑsã, lɑ b nidg pãng n nɑɑg foom n zɑbã, bãmbã lɑ yãmb pʋgẽ nebɑ. Lɑ roɑgdb ne tɑɑba, bãmb n sõmb ne tɑɑb fɑɑd rɩkr Wẽnd sebrã pʋgẽ. Wẽnd yɑɑ bũmbã fãɑ mitɑ.